Semeıde asa iri kólemde esirtki saqtaǵan er adam ustaldy
Abaı oblystyq polıtsııa departamenti baspasóz qyzmetiniń málimetine súıensek, «Karasora-2022» jedel aldyn alý sharasy barysynda tártip saqshylary QR Ulttyq ulany arnaıy bólimshesimen birge asa iri mólsherde esirtki saqtaǵan Semeı qalasynyń 32 jastaǵy turǵynyn ustady.
«Buryn sottalmaǵan er adamnyń turǵylyqty jerine júrgizilgen sanktsııalanǵan tintý barysynda 3,5 keliden astam keptirilgen marıhýana jáne 168, 4 gramm gashısh tabyldy. Atalǵan fakti boıynsha QR QK-niń 296-baby 4-bóligine (Esirtki quraldaryn, psıhotroptyq zattardy, sol tektesterdi asa iri mólsherde ótkizý maqsatynsyz zańsyz daıyndaý, qaıta óńdeý, satyp alý, saqtaý, tasymaldaý) sáıkes sotqa deıingi tergeý amaldary júrgizilýde», - deıdi departament bastyǵynyń orynbasary Narıman Kúldikov.
Kúdikti kinási dáleldengen jaǵdaıda 7 jylǵa deıingi merzimge bas bostandyǵynan aıyrylýy múmkin.
