Semeıde Amangeldi Seıithandy eske alýǵa arnalǵan respýblıkalyq týrnır bastaldy
ASTANA. KAZINFORM — Semeıde BAQ ókilderi arasynda shaǵyn fýtboldan Amangeldi Seıithandy eske alýǵa arnalǵan respýblıkalyq týrnır bastaý aldy, dep habarlaıdy Abaı oblysynyń ákimdiginiń baspasóz qyzmeti.
Semeıdegi «Spartak» stadıonynda BAQ ókilderi arasynda shaǵyn fýtboldan belgili jýrnalıst, kórnekti sport kommentatory Amangeldi Seıithandy eske alýǵa arnalǵan respýblıkalyq týrnır bastaldy.
Jarysqa elimizdiń 6 oblysy men 4 qalasynan 12 komanda (Qazaqstan tv (Astana qalasy), «Abaı oblysy» (Abaı oblysy), Aqmeshit (Qyzylorda oblysy), Atyraý (Atyraý oblysy), Kazmedia (Astana qalasy), Qareket (Jetisý oblysy), «Semeı» (Semeı qalasy), Setanta (Almaty qalasy), Taraz Press (Jambyl oblysy), Habar (Astana qalasy), Shymkent (Shymkent qalasy), Bek sport (Astana qalasy) qatysyp jatyr.
Amangeldi Seıithan atyndaǵy «Seitkhan cup» respýblıkalyq týrnıri 2022 jyly bastalyp, jyl saıyn dástúrli túrde uıymdastyrylyp keledi. Týrnır buǵan deıin tórt ret Almaty qalasynda ótti. Bıyl tuńǵysh ret tulǵanyń týǵan jerinde tuńǵyshtar mekeni, Alashtyń astanasy — Semeı qalasynda uıymdastyrylyp otyr.
Amangeldi Seıithan — qazaq sport jýrnalıstıkasyn jańa bıikke kótergen, efır mádenıetin qalyptastyrǵan, tutas bir býynǵa úlgi bolǵan qaıratker tulǵa. Eńbek jolyn 1991 jyly «Sport» gazetinde bastap, keıin qazaq televızııasynyń tarıhynda altyn árippen jazylǵan jarqyn belesterge jetti.
Fýtboldan 1998 jyly Frantsııadaǵy Álem chempıonatynda qazaq tilinde kommentator boldy. Odan keıin 1999 jyly Bangkoktegi Azııa oıyndaryn, 2000 jyly Sıdneıdegi Olımpııa oıyndaryn, 2002 jylǵy Solt-Leık-Sıtıdegi aq Olımpıadany «Habar» arnasynyń efırinde qazaqsha sóıletti. Ómiriniń sońǵy kúnderine deıin fýtzaldan BAQ ókilderi arasyndaǵy BAQ lıgada áriptesterimen dop tepti.
Osyǵan deıin fýtboldan Qazaqstan kýbogynyń ¼ fınalyna shyqqan barlyq komanda anyqtaldy.
