Semeıde altynshy synyp oqýshysyn soqqyǵa jyqqan jasóspirimderge qatysty sot sheshim shyǵardy
SEMEI. KAZINFORM – Abaı oblysynyń kámeletke tolmaǵandar isteri jónindegi mamandandyrylǵan aýdanaralyq soty Semeıdegi altynshy synyp oqýshysyn soqqyǵa jyqqan jasóspirimderdi arnaıy mektepterge jiberýge qatysty isti qarady.
Sot barysynda belgili bolǵandaı, kámeletke tolmaǵan eki bala jábirlenýshini óz úıiniń aýlasynda tosyp alǵan. Sol kezde aralarynda kıkiljiń shyqqan. Keıin sol jerge basqa da jasóspirimder kelip, jábirlenýshige qysym kórsete bastady.
L.,T.,M jáne V. kámeletke tolmaǵan B.-ny jylý qazandyǵy mańyna aparyp, uryp-soqqan. Osy ýaqytta M., V. jáne Sh. bárin vıdeoǵa túsirip alǵan.
- Eki ul 11 jasqa tolmaǵan, zań boıynsha tek osy jastan bastap mamandandyrylǵan mektepke ornalastyrýǵa bolady. Vıdeony túsirgen 12 jastaǵy qyzdyń arnaıy esepte turmaǵany, buryn quqyq buzýshylyq jasamaǵany, sabaqty jaqsy oqıtyny anyqtaldy. Úsheýi de ıývenaldy polıtsııanyń arnaıy esebine alyndy, - delingen sot úkiminde.
Al qalǵan úsh jasóspirim arnaıy mektepterge jiberildi. 13 jáne 16 jastaǵy eki qyz sot sheshimimen devıantty minez-qulyqty balalarǵa arnalǵan mamandandyrylǵan mektepke tórt aı merzimge barady. Sot olardyń jıi zań buzyp kelgenin anyqtady. Naqty aıtqanda, ishimdik ishken, qoǵamdyq oryndarda mas kúıde júrgen, túnde eresekterdiń qaraýynsyz úıden shyǵyp ketip otyrǵan. Qajet bolǵan jaǵdaıda mekteptiń ótinishi boıynsha bul merzim uzartylýy múmkin.
13 jastaǵy ul alty aı merzimge erekshe rejımdegi mektepke jiberildi. Ol eki aıda eki ret qylmystyq quqyq buzýshylyq jasaǵan. Bala 2025 jyldyń qańtarynan bastap ıývenaldyq polıtsııada esepte tur.
Sot úkimi áli zańdy kúshine engen joq.
Eske salsaq, buǵan deıin Semeıde jasóspirimder altynshy synyp oqýshysyn soqqyǵa jyqqanyn jazǵanbyz.