Semeıde alıment tólemeıtin ákeler abaqtyǵa qamala bastady
SEMEI. QazAqparat - Alıment tólemeı júrgen ákeler abaqtyǵa qamalady. Semeılik sot oryndaýshylar boryshkerlerge osylaı dep dabyl qaǵýda. Sebebi, búgingi kúni perzenti aldyndaǵy boryshyn óteýden qashyp júrgen ákeler kóp, dep habarlaıdy QazAqparat.
Buǵan deıin alıment tólemegender tek ákimshilik jaýapqa tartylyp, birneshe táýlikke qamaýǵa alynyp, kólik júrgizý kýálikterinen qaǵylyp, shetelge shyǵý quqyǵynan aıyrylyp kelgen edi. Endi balasy aldyndaǵy boryshyn tóleýden jaltaryp júrgen ákelerge qylmystyq is qozǵalyp, abaqtyǵa qamalady. Jyl basynan beri 10 áke sot sheshimimen qylmystyq jaýapqa tartylǵan. Al 30 ákeniń isi qazir sottyń qaraýynda.
«Búgingi kúni bizdiń keńse boıynsha 1340 alıment tóleıtin áke bar. Buǵan deıin 1723 bolǵan. Atqarylǵan jumystardyń arqasynda qazirde 1172 áke aı saıyn shamasy kelgenshe aqshasyn aýdaryp otyr. Biraq áli 168 áke osy ýaqytqa deıin tólemeı qashyp júr. Jalpy qaryz mólsheri 129 mln. 270 myń 574 teńge. Bularmen jumystar júrgizilip jatyr. Endi ákimshilik jaýapkershilik emes, qylmystyq jaýapqa tartylady. Túrli syltaý aıtyp, qashyp tólemeı júrgen ákelerge aıtarym, olarǵa salynatyn aıyppul da kóp. Sondyqtan aı saıyn tólep otyrý olarǵa tıimdi degim keledi»,-deıdi jeke sot oryndaýshy Azanbek Bektasov.
Boryshkerlerdiń kóbi turaqty jumysynyń joqtyǵyn alǵa tartatyn kórinedi. Sondyqtan mamandar Jumyspen qamtý ortalyǵy arqyly jumyssyz ákelerdi qyzmetke ornalastyrlyp jatyr. Alaıda usynylǵan jumystardan jalaqysyn syltaý etip bas tartatyndar da joq emes. Jyl basynan beri 30 ákege Jumyspen qamtý ortalyǵyna joldama berilgen. Sondaı-aq mamandar týǵan perzentine alıment tólemeı qashyp júrgen ákelerdiń jeke-múlkin sot sheshimi arqyly tárkilep, aýktsıon arqyly satylymǵa da qoıýda.
