Semeıde Álıhan Bókeıhanovqa tuńǵysh eskertkish ornatylady

ASTANA. QazAqparat - Qyrkúıek aıynda Semeıde Álıhan Bókeıhanovqa arnalǵan tuńǵysh úlken eskertkish ornatylady, dep habarlaıdy «QazAqparat» HAA tilshisi. 

Bul týraly búgin QR Ulttyq akademııalyq kitaphanasynda «Sakraldy Qazaqstan» ǵylymı-zertteý ortalyǵynyń basshysy, saıasattaný ǵylymdarynyń doktory Berik Ábdiǵalı málim etti.

«Bıyl Alash qozǵalysynyń 100 jyldyǵyna oraı, elimizdiń ár óńirinde túrli sharalar, konferentsııalar júrip jatyr. Qyzylorda oblysy Mustafa Shoqaıǵa eskertkish qoıdy. Semeıde bıyl Álıhan Bókeıhanovqa qoladan úlken eskertkish qoıý josparlanyp otyr. Estýimshe, oblys ákimdigi qarajat bólip, eskerktish qoıatyn oryndy belgilep jatyr. Bul Álıhan Bókeıhanovqa arnalǵan  Qazaqstandaǵy tuńǵysh úlken eskertkish bolmaq», - dedi B. Ábdiǵalı.

Eske sala ketsek, búgin QR Ulttyq akademııalyq kitaphanasynda Alashorda úkimeti men Alash avtonomııasynyń 100 jyldyǵyna oraı «El-Shejire» qoǵamdyq qory shyǵarǵan ǵalym-jazýshy Tursyn Jurtbaıdyń «Dvıjenıe Alash» atty 3 tomdyq qujattar jınaǵy men Bolat Múrsálimniń «Alashorda» fotoalbomynyń tanystyrylymy ótti. B. Múrsálimniń «Alashorda» fotoalbomynda Alash arystarynyń ómiri men qyzmeti fotoderekter arqyly kórsetilse , T.Jurtbaıdyń «Dvıjenıe Alash» atty 3 tomdyq jınaǵy arhıvtegi qupııa qujattar men sot materıaldary negizinde qurastyrylǵan .