Semeıde alǵash ret 685 úıge ystyq sý berildi
SEMEI. KAZINFORM – Abaı oblysynyń ákimi Berik Ýálıdiń tapsyrmasyna sáıkes Semeı qalasyndaǵy turǵyn úılerge ystyq sý berile bastady. Qala boıynsha ystyq sý júıesi qosylǵan 697 úı bar. Búgin sonyń 685-ine ystyq sý berildi.
Aımaq basshysy byltyr jazda Semeı qalasy turǵyndaryn jaz kezinde ystyq sýmen turaqty qamtamasyz etý máselesin sheshý joldary qarastyrylatynyn aıtqan bolatyn.
Oblys ákiminiń tapsyrmasymen bul másele muqııat zerdelenip, tıisti taldaý júrgizilip, oblys ortalyǵynda uzaq jyldar boıy sheshimin tappaǵan problemany sheshýdiń naqty joldary belgilendi. Aldyn ala daıyndyq jumystary júrgizildi. Byltyr jylytý maýsymyna daıyndyq jumystary aıasynda jalpy somasy 12,6 mlrd teńge 23 jylý ortalyqtary men 22 shaqyrym jylý jelisi jóndeldi.
«Semeı qalasynyń sol jaq jaǵalaýynda 277 úı bar. Qazirgi ýaqytta 270-i ystyq sýǵa qosyldy, 7 úıdiń qubyrlarynda jóndeý jumystary júrgizilýde. Oń jaq jaǵalaýda ystyq sý júıesi qosylǵan 420 úı bolsa, sonyń 415-i ystyq sýǵa qosyldy, 5 úıde jóndeý jumystary júrgizilip jatyr», – deıdi Semeı qalasynyń ákimi Ádilet Qojanbaev.
Semeı qalasynda 21 sáýirden bastap jylý berý toqtatylǵanymen, ystyq sý berý máselesi tez arada sheshimin tapty. Sol jaǵalaýda turǵyn úılerge JEO-1, oń jaǵalaýdaǵy turǵyn úılerge Ǵabbasov, «MEN», RK-3 qazandyqtary arqyly ystyq sý berilip jatyr.
Oblys ortalyǵynda 2025-2026 jylǵy jylytý maýsymy turaqty ótti. Jylý júıelerinde barlyq jumystar ýaqtyly júrgizildi. Jylý kózderi shtattyq rejımde jumys istedi.