Semeıde áleýmettik jeli arqyly aldaıtyn alaıaqtar kóbeıgen

SEMEI. QazAqparat – Semeı qalasynda áleýmettik jeli arqyly jalǵan jarnama júrgizetin alaıaqtar kóbeıe bastaǵan. Jyl bastalǵaly beri ınternettegi alaıaqtyqqa qatysty 66 fakt tirkelgen. Bul týraly qalalyq Polıtsııa basqarmasynyń baspasóz qyzmetinen málim etti, dep habarlaıdy QazAqparat tilshisi.

Kompıýter men uıaly telefon arqyly ınternet baǵdarlamalaryn sheber paıdalanatyn alaıaqtardyń taǵy bir túri saýda-sattyq platformalaryn da nazarda ustaıdy. Máselen, jaqynda semeılik zeınetker OLX.kz saıtynan jatyn bólme garnıtýry týraly habarlamany kórip, unatqan jıhazyn tıimdi baǵamen satyp almaq bolady. Ol kórsetilgen uıaly telefon nómirine baılanysqa shyǵyp, 27 jasar alaıaqtyń shotyna 220 myń teńge aqsha aýdaryp jibergen. Biraq, aldanyp qalǵanyn der kezinde ańǵaryp, polıtsııaǵa júginedi. Atalǵan fakti boıynsha qazir QR QK 190-babynyń 2-bóligi boıynsha sotqa deıingi tergeý amaldary júrip jatyr.

«Alaıaqtar sondaı-aq, AnyDesk, TeamWiever sııaqty mobıldi baǵdarlamalardy júktep alýdy «ótinedi» de, nátıjesinde sonyń kómegi arqyly jeke shottaryńyzǵa qol jetkize alady. Sóıtip, shotyńyzdaǵy aqshany úshinshi bireýge aýdaryp jiberedi. Sondyqtan, tanymaıtyn bireýler qońyraý shalyp, banktik derektemelerdi suraǵan jaǵdaıda áńgimeni birden toqtatyp, bank menedjerine habarlasyp, kartasyn buǵattatyp, polıtsııaǵa habar bergeni durys», - deıdi Semeı qalasy polıtsııa basqarmasynyń baspasóz hatshysy Lýnara Muqanova.

Basqarma qyzmetkerleri ınternet alaıaqtyǵynyń óris alyp bara jatqanyn eskertip, qala turǵyndaryn meılinshe saq bolýǵa shaqyrady.

«Negizinen qylmys jasaýshylardyń deni ózge elden bolǵandyqtan, qylmyskerlerdi anyqtaý óte kúrdeli. Alaıda, tártip saqshylary buǵan qaramastan, ınternet alaıaqtyǵymen barynsha kúresip keledi», - deıdi qalalyq PB baspasóz qyzmeti.