Semeıde alaıaqtyq jolmen baspana almaq bolǵan áskerı qyzmetshi sottaldy
SEMEI. QazAqparat - Semeıde áskerı qyzmetshi asa iri mólsherde alıaqtyq jasaǵany úshin sottaldy, dep habarlaıdy QazAqparat.
Semeı garnızonynyń áskerı soty aımaqtaǵy áskerı bólimderdiń biriniń burynǵy áskerı qyzmetshisine qatysty sot úkimin shyǵardy.
Anyqtalǵandaı sottalýshy 2013 jyly qyzmettik turǵyn úıdi zańsyz alý, keıinnen ol úshin aqshalaı ótemaqysyn alý maqsatynda óziniń páterin jaqyn týysyna formaldy túrde syıǵa tartqan. Sóıtip óziniń turǵyn úı jaǵdaıyn qasaqana nasharlatqan. Sol jyly Halyqqa qyzmet kórsetý ortalyǵynyń qyzmetkerleriniń tehnıkalyq qatelikter jiberýi saldarynan jyljymaıtyn múlik týraly anyqtamada onyń jeke menshiginde baspana joq ekeni kórsetilgen. Atalǵan málimetterdiń jalǵan ekenin bile tura, ol turǵyn úı komıssııasyna qyzmettik páter alý úshin kezekke turýǵa qujattaryn ótkizgen.
2017 jyly áskerı qyzmetshi memleketten qyzmettik turǵyn úı alyp, ony eńbek sińirgen jyldaryna baılanysty jekeshelendirý quqyǵyna ıe bolady. Alaıda úı jekeshelendirýge jatpaǵandyqtan, jekeshelendirý quqyǵynyń ornyna 17 000 000 teńgeden astam aqshalaı quny tólenedi. Osylaısha ol zańsyz árketteri arqyly memleketke asa iri mólsherde zalal keltirgen.
«Sot otyrysynda azamat óziniń kinásin tolyqtaı moıyndap, jasaǵan qylmysy úshin ókindi. Búgingi kúni memleketke kelgen zalaldyń orny tolǵan joq. Sondyqtan aıypkerge sot bes jylǵa bas bostandyǵynan aıyrý jazasyn taǵaıyndady. Biraq 13 jastaǵy balasyn eskerip, atalǵan jazany balasynyń 14 jasqa tolǵanyna deıin merzimge keıinge qaldyrý qajet dep sanady. Úkim zańdy kúshine engen joq»,-dedi Semeı garnızony áskerı sotynyń bas mamany Jamal Bekenova.
