Semeıde alaıaqtyq jasap, 8 mln teńgeni qaltaǵa basqan áskerı qyzmetshi sottaldy
ASTANA. QazAqparat - Semeı garnızony áskerı sotynda alaıaqtyq jasaǵan áskerı qyzmetshige qatysty qylmystyq is qaraldy, dep habarlaıdy QazAqparat vedomstvonyń baspasóz qyzmetine silteme jasap.
Oǵan QR Qylmystyq kodeksi 190-baby 3-bóligi 1,3 tarmaqshalarynda (iri kólemdegi alaıaqtyq) qarastyrylǵan qylmysty jasady degen aıyp taǵyldy.
Іs materıaldaryna sáıkes, aıyptalýshy bótenniń múlkin ıemdený maqsatynda boıjetkenmen tanysady. Onyń senimine kirgennen keıin alaıaqtyq jolmen zardap shegýshiniń 2 975 490 teńge somasyndaǵy aqshalaı qarajaty men altyn buıymdaryn alyp qoıǵan. Aıyptalýshy aldaǵy toıǵa daıyndyq maqsatynda mashına satyp alý jáne neke júzigin jasatý úshin azamatshadan aqsha alyp turǵan. Sottalýshy barlyq qarajatty óz qajettiligine jaratqan.
Sondaı-aq, ol birge qyzmet etýshi áriptesterinen de túrli syltaý aıtyp, jalpy somasy 5 401 920 teńgeni ıemdengen.
Sot aıyptalýshyny 4 jyl 6 aıǵa bas bostandyǵynan aıyrdy. Ol jazasyn qaýipsizdigi ortasha qylmystyq-atqarý júıesi mekemesinde óteıdi. Úkim zańdy kúshine engen joq.
