Semeıde alaıaq zeınetker balasyz áıelderdiń 3 mln teńgesin alyp ketken
SEMEI. QazAqparat - Semeıde bedeýlikten emdeımin dep turǵyndardy aldaǵan alaıaq zeınetker ustaldy. Bul týraly QazAqparat Semeı qalalyq ІІB baspasóz qyzmetine silteme jasap habarlaıdy.
57 jastaǵy alaıaq zeınetker 2017 jyldyń qańtar aıynan bastap 2018 jyldyń sáýir aıyna deıin erler men áıelderdi bedeýlikten emdeımin dep aldap kelgen. Turǵyndardyń senimine kirgen ol, bul qyzmeti úshin qomaqty qarjy alyp, óziniń dárilik zattaryn satatyn bolǵan. Alaıda aqsha qolyna tıgennen keıin izin sýytady. Ázirge 8 adamdy aldaǵany belgili boldy. Ákelgen shyǵyn kólemi 3 mln teńge.
"Zaton polıtsııa bólimine qala turǵyndary tarapynan birneshe aryz kelip tústi. Barlyǵy ózderin aldap ketken alaıaq azamatshany qylmystyq jaýapkershilikke tartý týraly. Óıtkeni alaıaq zeınetker bedeýlikten emdeımin dep ýáde berip, keıin aqshany alyp qashyp ketip otyrǵan",-dedi Semeı qalalyq ІІB Memlekettik til jáne aqparat bóliminiń jetekshisi Elýbek Ospanov.
Tergeý kezinde dárilik zattar tárkilenip, saraptama jasaldy. Al zeınetkerdiń ústinen alaıaqtyq áreketi úshin QR Qylmystyq kodeksiniń 190 baby, 2 tarmaǵy boıynsha is qozǵaldy.
