Semeıde alaıaq halyqty 63 mln teńgege aldap, aqshany qumar oıynǵa salǵan

SEMEI. KAZINFORM — Semeı qalasynda halyqty 63 mln teńgege aldap, aqshany qumar oıynǵa salǵan er adam sottaldy.

Polıtsııa qyzmetkerlerine alaıaqtyń qurbany bolǵan 32 turǵyn júgindi. Ótirik sózge senip qalǵan jábirlenýshiler er adamnyń qaryzǵa dep suraǵan aqshasyn bere salǵan. 

Osylaısha, alaıaq jábirlenýshilerden 250 myń teńgeden 11 mln teńgege deıin aqsha alyp keldi.

Sonyń saldarynan azamattarǵa keltirilgen jalpy shyǵyn kólemi 63 mln teńgeden asqan. 

«Semeı qalalyq PB krımınaldyq polıtsııa basqarmasy men SyberPol arnaıy bólimshesiniń qyzmetkerleri 35 jastaǵy kúdiktini ustady. Jaýap alý kezinde ol kinásin moıyndap, aqshany býkmekerlik keńsede báske tikkenin jetkizgen», — dep habarlady Abaı oblystyq Polıtsııa departamentinen. 

Qalalyq sot alaıaqtyq jasaǵan er adamǵa qatysty úkim shyǵardy. Sot sheshimimen sottalýshy 3 jyl 2 aıǵa bas bostandyǵynan aıyryldy.

Ol jazasyn qylmystyq-atqarý júıesiniń qaýipsizdigi ortasha mekemesinde óteıdi.