Semeıde alaıaq emshi ustaldy
SEMEI. QazAqparat - Semeıde alaıaq áıel emshi qolǵa tústi. 40 jastaǵy kelinshek dástúrli emes jolmen emdeımin dep turǵyndardyń senimine kirgen. Al kórsetken qyzmeti úshin qomaqy syıaqy alyp kelgen, dep habarlaıdy QazAqparat.
Áýezov polıtsııa bólimine 29 jasaǵy qala turǵyny aryz bergen. Aıtýynsha, alaıaq emshiniń qurbany bolǵan. 2018 jyldyń jeltoqsan aıynda kóshede tanys emes áıel adam kelip, ony áńgimege tartqan. Artynsha, ózin emshi retinde tanystyryp, qatty kóz tıgenin jáne dereý emdeý kerek ekenin aıtady. Bul úshin aldymen ózi taǵatyn altyn buıymdardy tazalaýdy suraıdy. Osylaısha emshiniń arbaýyna túsken qala turǵyny jalpy quny 1 mln teńge bolatyn altyn áshekeılerin oılanbastan qolyna ustata salady.
Alaıaq áıel gıpnoz jasaý arqyly óz oıyn júzege asyrǵan.
Shuǵyl sharalardyń nátıjesinde kúdikti retinde 40 jastaǵy qala turǵyny ustaldy.
Qazir onyń ústinen QR QK-niń 190 baby, 1 tarmaǵy boıynsha is qozǵalyp, sotqa deıingi tergeý jumystary júrýde.
«Krımınaldyq polıtsııa qyzmetkerleri oqıǵa ornynda saýsaq izderi boıynsha zertteý júrgizdi. Nátıjesinde kúdiktiniń jeke tulǵasy anyqtalyp, polıtsııa bólimshesine jetkizildi. Tergeý barysynda ol kinásin moıyndady. Alaıda urlanǵan zattar qaıtarylmady. Sebebi, altyn buıymdardy satyp, aqshasyn óz qajetine jaratyp úlgergen»,-dedi Semeı qalalyq polıtsııa basqarmasynyń baspasóz hatshysy Elýbek Ospanov.
