Semeıde alaıaq áıel 17 adamǵa «páter satqan»
SEMEI. QazAqparat – Semeı qalasynda polıtsııa qyzmetkerleri «páter satamyn» dep talaıdy tuzaqqa túsirgen alaıaqty quryqtady, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, turǵyndardan Áýezov polıtsııa bólimine alaıaqtyq faktisi týraly birneshe aryz túsken. Anyqtalǵandaı, 45 jastaǵy áıel zardap shekkenderge Jumabaev kóshesinde salynyp jatqan kópqabatty úı páterlerin satatyndyǵyn aıtyp sendirgen. Sóıtip olardan aldyn ala aqsha alyp otyrǵan. Sondaı-aq ákki alaıaq turǵyndarǵa ártúrli bankterden jáne qarjylyq uıymdardan nesıe alýyn suraǵan.
«Ol úı paıdalanýǵa berilgenge deıin nesıeniń aı saıynǵy bereshegin ózi tólep otyratyndyǵyn jetkizgen. Al qalǵan somany páter qunynan alyp tastaýǵa ýáde bergen. Sonyń qarymtasyna úıdi arzan baǵaǵa beretindigin aıtqan. Ózinde aqshanyń bolmaý sebebin «jýyq arada ınvestıtsııalyq qordan birneshe mıllıon teńgeniń túsýin kútip júrmin» dep túsindirgen», - dep habarlady vedomstvo ókilderi.
Polıtseıler alaıaqtyń 17 adamdy aldap soqqanyn anyqtady. Osynyń saldarynan jábirlenýshilerge 50 mln teńge mólsherinde materıaldyq zalal keltirilgen. Qazirgi ýaqytta fakti boıynsha QR QK-niń 190-baby, 3-bóligimen sotqa deıingi tergeý amaldary júrgizilýde.
