Semeıde «Alash arystary - Muhtar Áýezov» murajaıynyń jańa ekspozıtsııasy ashyldy
Jańa ekspozıtsııa 1997 jyly ashylǵan Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń bólimi retinde jumysyn bastap otyr.
Atalǵan qoryq-mýzeıdiń ǵylymı jumystar jónindegi orynbasary Meıramgúl Qaırambaevanyń aıtýynsha, Hákim Abaı kezinde osy úıdi jerlesi ári shákirti, Alash qozǵalysyna belsene qatysýshylardyń biri Ánııar Moldabaevqa satyp alýǵa kómek bergen. Sonymen birge, Abaı ózi Semeıge kelgen saparlarynda osy úıge túsetin bolǵan. Ánııar Moldabaevtyń úıinde uly aqynnyń balalary men týystary, Kókbaı Janataıuly men Shákárim Qudaıberdiuly, Alash qaıratkerleriniń de jıi bolǵany belgili. Bul úıde Ahmet Baıtursynuly áıeli Badrısafamen turǵan. Sonymen qatar, ǵulama jazýshy Muhtar Áýezov óziniń mekenjaıy retinde osy úıdi qujatta kórsetken.
«1944-1967 jyldary bul ǵımaratta Abaı mýzeıi ornalasty. Keıin balalar kitaphanasy jumys istedi. Uly Abaıdyń ómirine tikeleı qatysty tarıhı oryn retinde 1990 jyly ǵımarat uly aqyn mýzeıiniń teńgerimine berilip, Abaıdyń 150 jyldyq mereıtoıy qarsańynda 1992-1995 jyldary aralyǵynda mýzeıdiń ýaqytsha ekspozıtsııasy qonys tepti.1997 jyly bul ǵımaratta Táýelsiz Qazaqstannyń tarıhyndaǵy Alash tarıhyna arnalǵan tuńǵysh mýzeı «Alash arystary - Muhtar Áýezov» murajaıy ashylyp, halyqqa qyzmet kórsetip keledi», - deıdi Meıramgúl Qaırambaeva.
Dırektoryń orynbasarynyń aıtýyna qaraǵanda, ústimizdegi jyldyń basynda ǵımaratqa aǵymdaǵy jóndeý jumystary júrgizilgennen keıin mýzeı zaldarynda reekspozıtsııa jumystary jasalǵan. Jańa ekspozıtsııanyń tujyrymdamasyn belgili alashtanýshy ǵalymdar: UǴA akademıgi D.Qamzabekuly jáne S.Aqqulyuly daıyndaýǵa kómektesken. Osy tujyrymdamanyń negizinde taqyryptyq-ekpozıtsııalyq jospar daıyndaldy. Jańa ekspozıtsııada Alash qozǵalysy tarıhynyń 6 kezeńi tyń qujattar men derekter negizinde ózgeshe qyrynan kórsetilgen.
«Mýzeı ekspozıtsııasy keńeıip, ǵımarattyń buryn bos turǵan birinshi qabatynda HH ǵasyrdyń basyndaǵy úı ıntereri jasaldy. Ekinshi qabattaǵy ekspozıtsııa arnaıy tapsyryspen jasalǵan Á.Bókeıhan, A.Baıtursynuly, M.Dýlatov, Sh.Qudaıberdiuly, M.Áýezovtiń músinderimen tolyqtyryldy. Áıgili balaýyz fıgýralar sııaqty bul músinderdi jasaýda sýretshiler zamanǵa saı materıaldar - keramoplast jáne shynytalshyq qoldandy», - deıdi ol.
Mýzeıdiń ashylý saltanatyna oblys ákiminiń birinshi orynbasary N.Saqtaǵanov qala ákimi E.Sálimov, alashtanýshy ǵalymdar, qalanyń zııaly qaýymy jáne BAQ ókilderi qatysqan.
