Semeıde alapat órtten ana men bala qutqaryldy
ÓSKEMEN. QazAqparat - Semeıdegi 2 páterli turǵyn úıde órt boldy, dep habarlaıdy «QazAqparat» HAA tilshisi.
Órt sóndirý qyzmetine tótenshe oqıǵa jaıly aqparat 21:18-de kelip túsken. Birneshe mınýttan soń órtenip jatqan úıge jetken órt sóndirýshiler páterde qoıý tútinge tunshyǵyp, esinen tanyp jatqan 76 jastaǵy áıel men onyń 55 jastaǵy ulyn qutqaryp alady.
Qutqarýshylardyń basshysy Áset Toqtamysovtyń sózine qaraǵanda, taza aýaǵa shyqqan boıda er adam esin jıǵan, al onyń anasyna jedel medıtsınalyq kómek kórsetildi.
«№2 órt sóndirý bólimshesiniń kezekshi dárigeri Qarlyǵash Qalıekova jasandy jolmen tynys bergen soń, áıel es jıdy», - deıdi qutqarýshylar.
Órt sóndirýshiler jalynnyń arasynan úı ıeleriniń aqshasy men 440 myń teńgeniń tehnıkasyn (noýtbýk, smartfon) alyp shyǵyp úlgergen.
