Semeıde ál-Farabıdiń mereıtoıyna oraı respýblıkalyq aqyndar aıtysy ótedi

ÓSKEMEN. QazAqparat – Semeıde ál-Farabıdiń 1150 jyldyǵyna oraı respýblıkalyq aqyndar aıtysy uıymdastyrylmaq. Bul jaıly QazAqparat tilshisine qalalyq mádenıet jáne tilderdi damytý bóliminiń basshysy Nazerke Aqqojına aıtty.

Onyń sózine sensek, Ábý Nasyr ál-Farabıdiń mereıtoıyna arnalǵan is-sharalar jospary bekitilgen. Jyl kóleminde respýblıkalyq jáne óńirlik deńgeıdegi 20-dan astam shara ótkizý kózdelip otyr.

«Eń aýqymdylary – «Uly dalanyń uly tulǵasy – Ábý Nasyr ál-Farabı» atty respýblıkalyq ǵylymı-tájirıbelik konferentsııa men «Ábý Nasyr ál-Farabı murasy – adamzat baılyǵy» respýblıkalyq aqyndar aıtysy bolmaq. Sondaı-aq jas aqyndar músháırasy, ǵulama jaıynda teatrlandyrylǵan qoıylym jáne fılosoftyń týǵan jeri Otyrarǵa týrıstik sapar uıymdastyrylady. Budan bólek, barlyq bilim ordalarynda tanymdyq sharalar, dóńgelek ústelder ótkiziledi», - deıdi Nazerke Aqqojına.