Semeıde ákim men kásipker jer telimi úshin sottasyp jatyr
SEMEI. QazAqparat - Semeı qalasynyń ákimi Ermak Sálimov jeke kásipkermen jer telimi úshin sottasyp jatyr. Kásipker bul jer aýmaǵyn 4 mln teńgege aýktsıon arqyly satyp alǵan, dep habarlaıdy QazAqparat.
«Atameken» ulttyq kásipkerler palatasynyń aqparatyna sáıkes qala turǵyny Anar Baıkenova 2014 jyldyń qazan aıynda ótkizilgen birinshi aýktsıonda ǵımarat salý úshin úsh júz sharshy metr jer telimin satyp alǵan. Kásipker bul jerge eki qabatty nysan salýdy josparlaǵan. Joba quny 40 mln teńge.
Kásipkerdiń aıtýynsha, bul jerge ǵımarat salý úshin barlyq ruqsat qujaty bar. Sondyqtan qurylys jumystary bastalǵan. Qazirdiń ózinde shamamen 6 mıllıon teńge qarjy qurylysqa jumsalǵan. Biraq eki jyl ótken soń arada másele týyndaǵan. Qala ákimi kásipker men jer qatynastary bólimi arasynda jasalǵan jer ýchaskesin satý, satyp alý týraly shartty jaramsyz dep tanyp sotqa bergen. Belgili bolǵandaı bul jer zań boıynsha qurylys nysanyn júrgizýge kelmeıdi. Sebebi, jer ýchaskesi jol boıyndaǵy jalpyǵa ortaq jer.
«Men eshkimdi aıyptaǵym kelmeıdi. Qazirgi ýaqytta paıdalanylmaıtyn birqatar jer ýchaskeleri bar. Biz olardy anyqtap, memleketke qaıtaryp, qaıtadan satýǵa shyǵaramyz. Konkýrsqa qoıylǵan barlyq jańa jer ýchaskeleri úshin biz óz tarapymyzdan barlyq turǵydan úsh márte baqylaý jasaımyz. Ásirese, halyqtyń pikiri biz úshin óte mańyzdy», - dep túsindirdi jýrnalıstermen kezdesýde Ermak Sálimov.
Bul qurylys nysanynyń salynýyna turǵyndar da qarsy. Sebebi, bul jerdegi jasyl jelekke zaqym kelgen, qala kórkin de buzyp tur.
«Qurylys jumystary ótken jyldyń qazan aıynda bastaldy. Biz ekken barlyq aǵashty kesip, qurylys jumystaryn bastady»,- deıdi qala turǵyny Irına Bezrodnaıa.
Jergilikti bılik pen kásipker arasyndaǵy daýǵa endi núkteni sot qoıady. Al kásipker ShQO ákimi Danıal Ahmetovke osy másele boıynsha kómek surap, hat joldady.
