Semeıde aq tústi jedel járdem kólikteri jappaı saryala túske boıalýda
SEMEI. QazAqparat - Semeıde jedel járdem kólikteri saryala túske boıalyp jatyr, dep habarlaıdy QazAqparat.
Bir kólikti boıaý úshin shamamen 200 myń teńge qarjy kerek. Al qarajat jedel-járdem stantsııasynyń óz esebinen jumsalady. Sondyqtan barlyǵyn birden sary túske boıap, jaryq shaǵylystyratyn qyzǵylt elementterdi ornatý múmkin bolmaı tur.
Búgingi kúni qalada 36 jedel-járdem brıgadasy bar. Qazir tek bireýi ǵana sary túske boıalyp, elementtermen erekshelendi. Endi qalǵan kólikter birtińdep biryńǵaı standartqa 1 jyl ishinde kóshpek.
Semeıdegi Jedel járdem qosalqy stansasy ortalyǵynyń meńgerýshisi Elvıra Gataýllınanyń sózinshe, bul dárigerlerdiń jedel ári qaýipsiz qyzmet kórsetýine múmkindik beredi.
«2018 jyldan bastap barlyq jedel járdem kólikteri QR Densaýlyq saqtaý mınıstrliginiń buıryǵymen bekitilgen standartqa sáıkes ózgertilýi kerek. Ázirge qalada tek reanımatsııa kóligi ózgertildi. Talaptarǵa saı etip ózgertýge óz esebimizden aqsha jumsalady jáne bul arzan emes. Sonymen qatar kóliktiń syrty ózgergennen keıin onyń tehnıkalyq kýáligi de ózgeredi. Sondyqtan bir-birden ózgertemiz», - dedi Elvıra Gataýllına.
