Semeıde Ahat Shákárimulynyń shyǵarmalar jınaǵy tanystyryldy

SEMEI. QazAqparat – Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıinde ustaz, aqyn Ahat Shákárimulynyń shyǵarmalar jınaǵynyń tanystyrylymy ótti, dep habarlaıdy QazAqparat tilshisi.

Mýzeıdiń ǵylymı kontseptsııasynyń jeti baǵytynyń biri kontseptýaldy baǵyt dep atalady. Osy kontseptýaldy baǵyt aıasynda Abaı mýzeıine tikeleı qatysy bar tulǵalardyń murasyn qorda bar derektermen tolyqtyryp shyǵarý jáne monografııalar men ǵylymı zertteýler jazý josparlanǵan bolatyn. Mine, osy baǵyt boıynsha Ahat Shákárimuly shyǵarmalarynyń bir tomdyq jınaǵy jaryq kórdi.

«Bul jınaq negizinen Ahat Shákárimulynyń zaıyby Bátıma Jakenovanyń Abaı mýzeıine ótkizgen materıaldary negizinde daıyndaldy. Jınaqta aqynnyń óleńderi men poemalary jáne estelikteri berilgen. Ahat Shákárimuly poezııasynyń janrlyq turǵyda da tynysy keń. Ony aqyn óleńderiniń taqyryptyq-mazmundyq moldyǵy, poemalarynyń epıkalyq aýqymy kórsetedi. Sonymen qatar Ahat aqsaqaldyń estelikteri hakim Abaı, danyshpan Shákárim jáne Abaıdyń aqyndyq mektebiniń iri ókilderiniń ómiri men shyǵarmashylyǵyna shynaıy sáýle túsiretin tereń tarıhı mazmunymen de ózgeshelenedi», - dedi mýzeı dırektory Turdyqul Shańbaı.

Kitaptyń tusaýkeser rásimine Semeı qalasynyń mádenıet jáne tilderdi damytý bóliminiń basshysy Nazerke Aqqojına, tarıhı-ólketaný mýzeıiniń dırektory Qaırat Sabyrbaev, Qazaqstan Jazýshylar odaǵy Semeı óńiri fılıalynyń tóraǵasy Mereı Qart qatysty.

Aıta keteıik, 448 betten turatyn kitap «Járdem» baspasynda jaryq kórgen.