Semeıde aǵashtan túıin túıetin sheber turady
SEMEI. QazAqparat - Semeıde aǵashtan túıin túıetin qolóner sheberleri jeterlik. Solardyń biri - Səken Nazarhanuly. Búginde sheberdiń qolynan shyqqan qazaqy naqyshtaǵy buıymdar sheteldikterdiń de qyzyǵýshylyǵyn arttyrýda, dep habarlaıdy QazAqparat.
Sáken Nazarhan 1964 jyly 11 sáýirde Sarjal aýylynda týǵan. Mektep qabyrǵasynda oqyp júrgen kezinde-aq Asqar Slıamov esimdi ustazyna eliktep, qolóner sheberi bolýdy armandaıdy. Mektep bitirgennen keıin ásker qatarynda azamattyq boryshyn ótep keledi. Keıin Semeıdegi dızaınerlik ýchılışege túsip, bala kezdegi armanyna qol jetkizedi. Dıplom alǵan soń «Soıýz-Mır» sýretshiler sheberhanasyna sýretshi-dızaıner bolyp jumysqa ornalasady. Jumys istep júrip joǵary oqý ornyna syrttaı túsip, beıneleý óneri fakýltetin bitiredi.
Kóne dástúrdi jalǵastyryp kele jatqan qolóner sheberi búginde qazaqı naqyshtarmen órnektelgen kıizúı jabdyqtaryn, ydys-aıaqtar men ulttyq saz aspaptaryn, qarý-jaraq túrlerin jasaıdy.
«Eń aldymen aǵashtan sandyq, dóńgelek ústel, besik, tostaǵan, torsyq, ojaý sekildi zattardy jasadym. Olardy oıý-órnektermen bezendirdim. Odan keıin qobyz, dombyra jasaýdy qolǵa aldym. Birtindep teri, kıizden buıym jasaýdy meńgerdim. Ýaqyt ótken saıyn jasaǵan zattaryma qyzyǵýshylyq artyp, suranys kóbeıdi. Qazir aǵash, súıek, teri, melhıor, kúmis sııaqty materıaldardy paıdalanyp barlyq buıymdy qazaqy naqyshta jasaımyn», - deıdi sheber.
Búginde sheber Semeıdiń tarıhı-ólketaný murajaıy men Abaı mýzeıimen baılanys ornatqan. Mundaǵy maqsaty - murajaıda saqtalǵan eski buıymdardy qaıta qalpyna keltirý. Ulttyq ónerdi nasıhattap júrgen sheberdiń buıymdaryna búginde suranys joǵary. Sondyqtan týyndylarynyń jeke kórmesin de jıi uıymdastyryp otyrady. Jáne buıymdary «Ekspo - 2017» kórmesine qatysyp, qazaqtyń ulttyq ónerin sheteldikterge tanystyryp qaıtqan.
Sheberdiń endigi armany - gobelen ónerin meńgerý. Ol shı men júndi ornymen paıdalana otyryp, jasaǵan ár zatyna ulttyq ár bergisi keletinin aıtady.
