Semeıde aǵash basyp qalǵan kóliktiń ıesi kommýnaldyq qyzmetten ótemaqy óndirip aldy
SEMEI. QazAqparat - Semeıde kóligine aǵash qulaǵan qala turǵyny qalalyq Turǵyn úı-kommýnaldyq sharýashylyǵy bólimin sotqa berdi. Іsti qaraǵan qalalyq sot kólik ıesine 175 myń teńge materıaldyq ótemaqy tóleý týraly sheshim shyǵardy, dep habarlaıdy QazAqparat.
Oqıǵa aǵymdaǵy jyldyń jazynda Morozov kóshesinde oryn alǵan. Kóligin joldyń jıegine qoıyp, jumystarymen ketken áıel qaıta oralyp kelgende kóligin shirigen aǵash qulap, basyp qalǵanyn kóredi. Kóliktiń tóbesi ortasyna túsip, terezeleri synǵan. Kólik ıesi birden polıtsııaǵa aryz jazyp, kóligin qalypqa keltirý úshin qansha qarajat ketetinin eseptetken. Shyǵyn kólemi 294 000 teńge bolǵan.
Tekserý kezinde kólik turaqtaǵan jasyl aýmaqtyń qalalyq TÚKSh bólimine tıesili ekeni anyqtalǵan. Áıel adam oryn alǵan keleńsizdikti daý-damaısyz sheshkisi keletinin jetkizgen. Alaıda kommýnaldyq sharýashylyq bólimindegiler kólik ıesiniń shaǵymyna nazar aýdarmaǵan. Osydan keıin ol máseleni sheshý úshin sotqa júgingen. Osylaısha ol TÚKSh bóliminen 352 myń teńge ótemaqy tóleýin talap etken.
«Іsti qaraǵan qalalyq sot TÚKSh kólik ıesine 175 myń teńge ótemaqy tóleý týraly sheshim shyǵardy. TÚKSh bólimi materıaldyq shyǵyndy 2019 jyldyń 3 qańtaryna deıin kólik ıesine tóleýi tıis», - dep málim etti sottyń baspasóz qyzmeti.
