Semeıde adamdardy órtten qutqarǵan 4 azamat marapattaldy
SEMEI. QazAqparat – Semeı qalasynyń 4 turǵyny birneshe adamdy órtten qutqarǵany úshin marapattaldy, dep habarlaıdy QazAqparat tilshisi.
Semeıde bir otbasyn órtten qutqarǵan polıtsııa qyzmetkerleri Dıaz Aǵzamov pen Azamat Ibraıhanovqa «Tótenshe jaǵdaılardaǵy erligi úshin» tósbelgisi saltanatty túrde tabystaldy.
«24 qańtarda Parhomenko kóshesindegi jer úıden órt shyqqany jaıly habar túsken. Qyzyl jalyn úıdiń kireberisi men shatyrdyń aǵash qurylymdaryn sharpydy. Órt sóndirýshiler kelip jetkenshe sol mańaıda júrgen polıtsııa qyzmetkerleri tereze arqyly ishke kirgen. Jedel qımyldaǵan saqshylar 1963 jylǵy er adamdy, onyń 1967 jylǵy áıelin, 18 jastaǵy ulyn jáne 90 jastaǵy ákesin syrtqa alyp shyqty. Olarǵa eshqandaı zaqym kelgen joq», - dep habarlady ShQO Tótenshe jaǵdaılar departamentiniń baspasóz qyzmeti.
Budan bólek, «Órtte kórsetken qaısarlyǵy úshin» tósbelgisimen Semeı qalasynyń eki turǵyny Stanıslav Korıakovskıı men Sergeı ıAtsýk marapattaldy.
«Kórshi úıdegi órtti kórgen olar esh oılanbastan kómekke umtyldy. Jatyn bólmeniń terezesin balǵamen syndyryp, qart kisini syrtqa alyp shyqqan. Iis tıgen zeınetkerge jedel járdem dárigerleri alǵashqy kómek kórsetti», - delingen málimette.
