Semeıde «Adal adam – adal eńbek» jármeńkesinde 135 bos jumys orny usynyldy
SEMEI. KAZINFORM – Abaı oblysynyń ákimdigi men oblystyq prokýratýranyń birlesýimen Semeı qalasynyń Ertis jaǵalaýynda «Adal adam – adal eńbek» atty bos jumys oryndary jármeńkesi ótti. Áleýmettik mańyzy joǵary is-shara jumys izdeýshiler men jumys berýshilerdi bir alańda toǵystyryp, ózara tikeleı baılanys ornatýǵa múmkindik berdi.
Jármeńkege óńirdegi iri kásiporyndar, memlekettik mekemeler, jeke kompanııalar men bilim berý uıymdary qatysty. Sharaǵa 34 jumys berýshi mekeme qatysyp, 135 bos jumys ornyn usyndy. Jalpy oblys boıynsha 685 jumys orny qoljetimdi ekeni aıtyldy.
– Abaı oblysynyń ákimdigi oblystyq prokýratýramen birlesip, Prezıdent tapsyrmasyna sáıkes «Adal eńbek – adal azamat» aktsııasy aıasynda bos jumys oryndary jármeńkesin uıymdastyrdy. Qazirgi tańda 685 bos jumys orny usynyldy. Jármeńkeniń basty maqsaty – áleýmettik osal toptaǵy azamattardy, múmkindigi shekteýli jandardy, sondaı-aq probatsııa qyzmetinde esepte turǵan azamattardy jumyspen qamtý, - dedi Abaı oblysynyń jumyspen qamtý jáne áleýmettik baǵdarlamalardy úılestirý basqarmasynyń basshysy Aıman Nurlybek.
Jármeńke barysynda jumys berýshiler ózderiniń bos jumys oryndaryn usynyp, al jumys izdeýshiler túıindemelerin tapsyryp, sol jerde áńgimelesýden ótti. Sonymen qatar qatysýshylarǵa kásiptik baǵdar berý, qaıta daıarlaý jáne biliktilikti arttyrý máseleleri boıynsha keńester usynyldy. Ásirese, múgedektigi bar azamattar, probatsııa esebindegi jáne bas bostandyǵynan bosap kelgen tulǵalardy jumyspen qamtýǵa basymdyq berildi. Sondaı-aq kolledj ben joǵary oqý oryndarynyń túlekteri úshin alǵashqy jumysqa ornalasýǵa múmkindik jasaldy.
Іs-sharaǵa prokýratýra organdarynyń ókilderi, ákimdik qyzmetkerleri, jumys berýshiler, jumys izdeýshiler jáne kásipkerler qatysty.
– Men 4 kýrs stýdentimin, bastaýysh synyp muǵalimi mamandyǵynda bilim alyp jatyrmyn. Búgin oqý ornymyzben birge osy «Adal adam – adal eńbek» jármeńkesine keldik. Kóptegen maǵlumat alyp, ózimizge qajetti aqparattardy jınadyq, - dedi stýdent Adel Bókeshova.
Aıta keteıik, bıyl oblysta 13 myńnan astam jańa jumys ornyn qurý josparlanǵan. Onyń úshten biri búginde oryndalǵan. Uıymdastyrýshylardyń aıtýynsha, mundaı jármeńkeler adal eńbekke suranysty arttyryp, halyqtyń tabysyn kóbeıtýge yqpal etedi.
