Semeıde Abaıdyń 3 poemasy zaǵıp jandarǵa arnalǵan qarippen jaryq kórdi

SEMEI. QazAqparat – Semeı qalasyndaǵy Zaǵıp jáne nashar kóretin azamattarǵa arnalǵan kitaphanada Braıl qarpimen basylǵan Abaı shyǵarmalarynyń tanystyrylymy ótti, dep habarlaıdy QazAqparat tilshisi.

Kitaphana qyzmetkerleriniń aıtýynsha, qalalyq ákimdiktiń qoldaýymen arnaıy «Duxbery» baǵdarlamasy satyp alynǵan. Sonyń arqasynda kitaphana alǵashqy kitaptaryn Braıl shrıftimen basyp shyǵardy. Bul Abaıdyń «Masǵut», «Eskendir» jáne «Ázim áńgimesi» atty úsh poemasy, sondaı-aq hakim aýdarǵan I.Krylovtyń mysaldary.

«Bizdiń kitaphanada Abaıdyń Braıl shrıftimen basylǵan kitaptary bolmaǵan edi. Osynda kelgen kezderimizde kitaphanashylar uly oıshyldyń týyndylaryn oqyp beretin. Endi qazaqtyń bas aqynynyń shyǵarmalaryn óz betimizben oqı alatynymyzǵa qýanyshtymyz», - dedi arnaıy kitaphananyń oqyrmany Klara Qusaıynova.

Sonymen qatar aýdıokitap túrinde jaryq kórgen Abaı shyǵarmalary tanystyryldy. Kitaphananyń áli de Braıl qarpindegi ádebıetterdi memlekettik tilde shyǵarýǵa múmkindigi bar.