Semeıde Abaı mýzeıinde 3 jańa zal ashyldy
SEMEI. QazAqparat - Semeıde Abaıdyń «Jıdebaı-Bórili» memlekettik qoryq-mýzeıinde «Úsh qaınar»: Abaı shyǵarmashylyǵy», «Abaı joly» - álem ádebıetiniń jaýhary», «Qaıym Muhamedhanov - abaıtanýshy» atty úsh ekspozıtsııa zaly ashyldy, dep habarlaıdy QazAqparat.
Abaı shyǵarmashylyǵyna arnalǵan alǵashqy zaldan kórermen qaýym danyshpan aqyn nár alǵan qazaqtyń halyq aýyz ádebıeti, shyǵys halyqtarynyń poezııasy, orys jáne batys ádebıetiniń ozyq týyndylary syndy úsh qaınar bulaqqa qanyǵady. Munda ejelgi óleń-jyrlaryna, ańyz-ertegilerine, Abaı arqyly el arasynda keń taraǵan shyǵys shaıyrlarynyń jyr-dastandaryna, orys jáne batys ádebıeti ókilderiniń klassıkalyq eńbekterine molynan oryn berilgen. Al ekinshi zal kemeńger jazýshy Muhtar Áýezovtiń «Abaı joly» roman-epopeıasyna arnalyp, kelýshilerge ǵulamanyń abaıtaný salasyndaǵy tuńǵysh ǵylymı-zertteýleri, maqalalary jáne álem halyqtary tilderine aýdarylǵan eńbekteri usynylady. Sonymen birge onda áıgili roman-epopeıa týraly shetel jazýshylarynyń pikirleri de berilgen.
Úshinshi ekspozıtsııalyq zalǵa asa kórnekti abaıtanýshy ǵalym Qaıym Muhamedhanovtyń ádebı-ǵylymı eńbekteri shoǵyrlanǵan. Sondaı-aq, osy kórme zalynan uly aqynnyń ómiri men shyǵarmashylyǵyn zertteýshiler Tóken Ibragımov, Kámen Orazalın, Muzdybaı Beısenbaevtyń eńbekterine de laıyqty oryn berilgen.
«3 jańa zal halyqaralyq mýzeı kúnine baılanysty ashylyp otyr. Turaqty túrde jumys isteıtin zaldar kelýshilerge Abaı shyǵarmashylyǵyn tanytýǵa burynǵydan da úlken áser etedi dep senemiz. Kórermen nazaryna jeke ómirine qatysty dúnıeleri, qoljazba eńbekteri jáne taǵy basqa zattar usynylyp otyr", - dedi Abaıdyń «Jıdebaı-Bórili» memlekettik qoryq-mýzeıi dırektorynyń orynbasary Meıramgúl Qaırambaeva.
