Semeıde Abaı marafonyna oraı birqatar kóshe jabylady

SEMEI. QazAqparat – Semeı qalasynda Abaı marafonyna oraı birqatar kóshe jabylady, dep habarlaıdy QazAqparat tilshisi Semeynews.kz saıtyna silteme jasap.

Oblys ákimdigi baspasóz qyzmetiniń málimetine súıensek, marafon Abaı dańǵylynda bastalady. Sodan soń qatysýshylar Abaı kóshesinen aspaly kópirge júgirip, Turlyhanov kóshesinen sol jaǵalaýdaǵy aınalma jolǵa túsedi.

Ary qaraı Táńirbergenov kóshesinen kólik kópirine qaraı ótip, qaıtadan Abaı kóshesine shyǵady. Marafon kezinde bul kósheler jabylady.

«Júrgizýshilerden baǵytty aldyn ala josparlap alýdy suraımyz, óıtkeni sol jaǵalaýdaǵy aınalma jol Áýezov dańǵyly men Boztaev kóshesinen jabylady. Turǵyndar Rysqulov kóshesine barý úshin Selevın kóshesimen, odan ári Rykov nemese Avtodorojnaıa kósheleri arqyly ótýi kerek. Sondaı-aq Spartak nemese Kármenov kósheleri arqyly Glınka, Dokýchaev jáne Bı Boranbaı kóshelerine baryp, aspaly kópirge shyǵa alady. Ary qaraı Abaı kóshesinen basqalary túgeldeı ashyq bolady», - delingen aqparatta.

Eske salsaq, osyǵan deıin Semeıde Abaı marafony ótetindigin habarlaǵan edik.