Semeıde Abaı kúninde qandaı sharalar ótedi
SEMEI. QazAqparat – Semeı qalasynda Abaı kúninde birqatar sharalar josparlanyp otyr, dep habarlaıdy QazAqparat tilshisi.
«Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıinde Abaıdyń 176 jyldyǵy aıasynda birqatar merekelik is-sharalar ótedi.
Atap aıtqanda, QR Sýretshiler odaǵynyń múshesi, professor Nurbulan Ótepbaevtyń «Kórgenim... Kóńildegim...» atty kórmesi ótedi. Sýretshiniń kórmesi osyǵan deıin Óskemen, Pavlodar, Almaty jáne Nur-Sultan qalalarynda uıymdastyrylǵan bolatyn.
«Abaı kúnine oraı birneshe shara ótkizemiz. Eń áýeli hakim eskertkishine gúl shoqtaryn qoıýmen bastaımyz. Odan keıin «Abaı mýzeıiniń ǵylymı tujyrymdamasy« atty dóńgelek ústel ótedi. Sondaı-aq uly Abaıdyń týǵan kúninde «Kazakhstan Speedcubing Federation» komandasy 3000 tekshe rýbıkten turatyn panno-portret jasamaq», - dedi mýzeı dırektory Turdyqul Shańbaı.
