Semeıde 90 qonaq shaqyryp, quda kútken kisi polıtseılerdi dámhanaǵa kirgizbeı qoıǵan

SEMEI. QazAqparat – Semeı qalasynyń turǵyny 90 adamdy shaqyryp, quda kútken, dep habarlaıdy QazAqparat tilshisi.

Búginde shahardaǵy monıtorıng toptary karantın shekteýleriniń saqtalýyn qadaǵalaý maqsatynda reıd sharalaryn jalǵastyrýda.

Kezekti reıd barysynda «Vanıl» dámhanasynda otbasylyq shara ótkizilgeni anyqtalǵan.

Mekeme ıesi quqyq qorǵaý organdarynyń qyzmetkerlerine bul dámhana onyń jekemenshigi ekenin, týystaryn jaı ǵana keshki asqa shaqyrǵanyn aıtyp, olardy kirgizbeı qoıdy.

Osylaısha, monıtorıng top ókilderi 1 saǵat boıy ishke kire almaǵan. Anyqtalǵandaı, karantın shekteýine qaramastan quda kútken turǵyn 90 adam shaqyrǵan.

«Bizdiń maqsatymyz - pandemııamen kúresý. Sondyqtan oblystyq bas sanıtar dárigeriniń qaýlysyn saqtaý - bárimizge ortaq talap. Qazir azamattar óz bıznesin shekteý sharalaryna beıimdeýi tıis, - deıdi «Shyǵys - adaldyq alańy» jobalyq keńsesiniń jetekshisi Marjan Baqyt.

Atalǵan dámhana ıesine ÁQBtK 425-babyna sáıkes hattama toltyrylyp, 1600 AEK kóleminde aıyppul salyndy.

Sondaı-aq ol QR QK 131-baby boıynsha qylmystyq jaýapkershilikke tartylmaq.

Aıta keteıik, qazan aıynyń basynan beri Semeıdegi monıtorıng toptary 236 zańbuzýshylyqty anyqtaǵan.