Semeıde 8-synyp oqýshysy soqqyǵa jyǵyldy
SEMEI. KAZINFORM — Semeıde «Holodnyı klıých» yqsham aýdanynda oqýshy qyzdy soqqyǵa jyqqan. Kýágerdiń aıtýynsha, bir top bala qyzdy ishinen teýip, judyryqpen urǵan.
— «Holodnyı klıých» yqsham aýdanynda nárestemmen emhanaǵa keldim. Qabyldaýdan keıin dálizge shyqqanymda bir top balany kórdim. Basynda oınap júr eken dep oıladym. Kózim durys kórmegendikten, telefonymnyń kamerasymen jaqyndatyp qaraǵanymda qyz balany ishinen teýip, judyryqtap jatqandaryn kórdim. Men áreket etkenshe, tek bir sátti túsirip úlgerdim, — deıdi turǵyndardyń biri.
Polıtsııa departamentiniń dereginshe, janjal № 48 mektep oqýshylary arasynda bolǵan. Saldarynan segizinshi synyp oqýshysy soqqyǵa jyǵylyp, japa shekti.
— Atalǵan yqsham aýdandaǵy balalar alańynda 3-synyp oqýshysy men 8-synyp oqýshysynyń arasynda janjal boldy. Kámeletke tolmaǵandarmen profılaktıkalyq áńgime júrgizildi. 8-synyp oqýshysynyń zańdy ókilderi aryz jazýdan bas tartyp, ekinshi tarapqa shaǵymdarynyń joq ekenin bildirdi, — deıdi Abaı oblysy Polıtsııa departamenti
Aıta keteıik, janjalǵa sebepker bolǵan oqýshyǵa qatysty materıal jınalyp, onyń áreketi Semeı qalasy ákimdigi janyndaǵy kámeletke tolmaǵandardyń quqyqtaryn qorǵaý jónindegi komıssııada qaralatyn bolady.
Budan bólek, oqýshynyń ata-analaryna bala tárbıeleý jónindegi mindetterin tıisti deńgeıde oryndamaǵany úshin ákimshilik jaýapkershilik qarastyrylǵan.
Osyǵan deıin Semeıde 15 adam ata-analyq quqyǵynan aıyrylǵanyn jazdyq.