Semeıde 8 mln teńge jymqyrǵan mektep býhgalteri sottaldy
Qaladaǵy №42 mektepte isteıtin 54 jastaǵy esepshi áıel 2017 jyldyń aqpanynan 2018 jyldyń qarasha aıy aralyǵynda jalpy somasy 8 256 391 teńge jymqyryp úlgergen.
Óziniń jalaqy alatyn bank kartasy nesıe boıynsha buǵattalǵan soń, ol mekteptiń basqa qyzmetkerlerimen kelisip, aı saıynǵy aqshasyn solardyń shotyna aýdaryp kelgen. Keıin ózine alyp otyrǵan. Al jymqyrǵan aqshany jeke paıdasyna jaratqan.
QR QK-niń 189-baby, 3-bóliminiń 2-tarmaǵy boıynsha (senip tapsyrylǵan bóten múlikti ıemdenip alý nemese talan-tarajǵa salý) qylmystyq jaýapkershilikke tartylǵan áıel tergeý kezinde zańsyz áreketin tolyq moıyndap, ókinetinin jetkizdi.
Qylmystyq isti qaraǵan qalalyq №2 sot esepshini kináli dep tanyp, 2 jylǵa bas bostandyǵynan aıyrdy.
«Sot sheshimimen sottalýshy sondaı-aq, memlekettik qyzmette, jergilikti basqarý uıymdarynda, bankte, memlekettik uıymdarda, aktsıoneri memleket bolyp tabylatyn ulttyq holdıngterde, ulttyq kompanııalarda jumys isteý quqyǵynan aıyryldy», - dedi №2 sottyń baspasóz qyzmetinen.