Semeıde 700 bos oryn usynylatyn jumys jármeńkesi ótedi
NUR-SULTAN. QazAqparat – 11 qazan kúni Semeıde Mádenıet saraıynda bos oryndar jármeńkesi ótedi. Onda túrli kásiporyndar men mekemelerden 700-ge jýyq bos oryn usynylady, dep habarlaıdy QazAqparat óńirdiń aqparat ortalyǵyna silteme jasap.
Jármeńke jumysyna 200-den astam jumys izdeýshi, qalanyń 30-ǵa jýyq kásiporyndary men mekemeleri qatysady. Olardyń ishinde «Qarajyra» AQ, Semeı mashına jasaý zaýyty, Shyǵys Qazaqstan un-qurama jem kombınaty, «Semeı tsement zaýyty ÓK» JShS, Semeı Qurylys materıaldary, Kapolıgraf, Gordorstroı, Qazaqtsement, Daewoo Bus, Prıırtyshskaıa broılerlik qus fabrıkasy, Roza VVK, Eıkos, Semeı mehanıkalyq zaýyty, Semeı mashına jasaý zaýyty jáne t.b. kásiporyndar bar.
Jumys berýshiler 700-ge jýyq bos jumys ornyn, onyń ishinde 300-ge jýyq qyzmetker jáne 400-ge jýyq jumysshy ornyn usynady. Jumys izdep júrgen adamdarǵa áleýmettik jumys oryndary, aqyly qoǵamdyq jumystar jáne jastar tájirıbesi, sondaı-aq eńbek naryǵynda suranysqa ıe mamandyqtar boıynsha kásiptik oqytý kýrstary usynylady.
Jármeńke qatysýshylaryna slaıdtar, býkletter, stendter kórsetiledi.
Budan basqa, Jumyspen qamtý qyzmetiniń mamandary ataýly áleýmettik kómek kórsetýde, shaǵyn kredıt berýde Memlekettik kirister basqarmasynyń jańa tásilderi týraly keńester beredi.
Jumyspen qamtý ortalyǵynyń dırektory Tursynbek Shınjın ataýly áleýmettik kómek kórsetýdiń jańa tásilderi týraly aıtyp beredi.
Bastalýy saǵat 10.00-de.