Semeıde 600 lıtr qymyz tegin taratyldy
SEMEI. QazAqparat - 1 mamyr - Qazaqstan halqynyń birligi kúninde Semeıde «Qymyzmuryndyq» merekesi ótti. Jınalǵan turǵyndarǵa 11 qymyzdyń túri tegin úlestirildi, dep habarlaıdy QazAqparat.
«Qymyzmuryndyq» merekesi qalada dástúrge aınalǵan. Ortalyq alańda ótken sharada qymyzdyń qunan, dónen, besti, bal, túńeme, sirge jııar, sary, ýyz, jýsa, basty, qysyraq qymyz túri kópshilikke usynyldy. Barlyǵy 600 lıtr. Sharany uıymdastyrǵan qalalyq Mádenıet bólimi men «Qazaq» áleýmettik-mádenı ortalyǵy, «Ahaý, Semeı!» etnomádenı ortalyǵynyń ájeleri.
Qymyzdan dám tatýshylarǵa sondaı-aq sýsynnyń tarıhy men jasalý joldary týraly da aıtyldy.
«Jyl ótken saıyn merekege qyzyǵýshylyq artyp keledi. Byltyr 200 lıtr qymyz berilse, bıyl 600 lıtrden artyq qymyzdy turǵyndarǵa tegin berdik. Merekege jınalǵandar qymyzdy qanǵansha ishti. Negizi 500 lıtr qymyz ákelingen. Biraq sońynda jetpeı qosymsha 100 lıtrden artyq taǵy ákelindi. Shamamen 5 myńnan astam adamǵa berildi»,-dedi «Ahaý, Semeı!» etnomádenı ortalyǵynyń tóraıymy Gúljıhan Jumataeva.
