Semeıde 60 jastaǵy júrgizýshiniń kesirinen bes kólik apatqa ushyrady

ASTANA. KAZINFORM — Semeı qalasynda bes avtokólik soqtyǵysqan jol-kólik oqıǵasy tirkeldi, dep habarlaıdy Abaı oblysy Polıtsııa departamentiniń baspasóz qyzmeti.

Vedomstvo málimetinshe, 2025 jylǵy 20 qazan kúni saǵat shamamen 16:29–da Qarjaýbaıuly kóshesinde 60 jastaǵy júrgizýshi Hyundai Tucson markaly avtokólikti basqaryp kele jatyp, jol qozǵalysynyń qaýipsizdigine kóz jetkizbeı jáne jyldamdyq rejımin saqtamaǵandyqtan, aldynda turǵan Nissan Skyline markaly avtokólikpen (júrgizýshisi — 41 jastaǵy áıel) soqtyǵysqan. Soqtyǵys saldarynan Toyota Camry, Hyundai Tucson, Volkswagen Golf jáne Kia Bongo markaly kólikterdiń qatysýymen tizbekti jol apaty boldy.

— Hyundai Tucson jáne Nissan Skyline avtokólikteriniń júrgizýshileri medıtsınalyq mekemege tekserilý úshin jetkizildi. Basqa júrgizýshiler zardap shekken joq, degenmen kólikterine materıaldyq zalal keltirildi. Atalǵan fakti boıynsha polıtsııa qyzmetkerleri tekserý júrgizip, jol-kólik oqıǵasynyń mán-jaıyn jáne alǵan jaraqattardyń aýyrlyq dárejesi anyqtalyp jatyr, — delingen habarlamada.

Budan buryn BQO-da jol apatynan bir adam qaza taýyp, úsheýi aýrýhanaǵa jetkizilgenin jazǵanbyz.