Semeıde 6 stýdenttiń bank kartasy aqsha aýdarýǵa paıdalanylǵan: bir shotqa 16 mln teńge túsken
ASTANA. KAZINFORM — Semeıde alty stýdenttiń bank kartalary ınternet-alaıaqtyqtan túsken aqshany aýdarý jáne qolma-qol aqshaǵa aınaldyrý úshin paıdalanylǵany anyqtaldy. Bir stýdenttiń shotyna ǵana 25 azamattan 16 mln teńgeden astam qarajat túsken. Bul týraly QMA málim etti.
QMA Abaı oblysy boıynsha departamenti dropperlerdi izdep, olardyń bank shottaryn aqsha aýdarý jáne qolma-qol aqshaǵa aınaldyrý úshin paıdalanǵan adamdar tobynyń zańsyz áreketin toqtatty.
Semeı qalasynda jergilikti ýnıversıtettiń alty stýdenti anyqtalyp, olardan jaýap alyndy.
— Tergeý derekteri boıynsha, olarǵa tıesili bank kartalary aqsha qabyldaý úshin paıdalanylǵan. Keıin túsken qarajat bólshektelip, basqa shottarǵa aýdarylǵan. Bul onyń shyǵý tegin jasyrýǵa, qarjy aǵynyn baqylaýdy qıyndatýǵa jáne keıin aqshany qolma-qol sheship alýǵa múmkindik bergen. Stýdentterdiń biriniń shotyna ǵana 25 azamattan 16 mln teńgeden astam qarajat túsken, — delingen habarlanǵan.
Agenttiktiń málimetinshe, aqsha jibergen azamattar ınternet-alaıaqtyqqa baılanysty ister boıynsha jábirlenýshiler ekeni anyqtaldy. Olar eldiń 11 óńirin qamtıdy: Abaı, Qaraǵandy, Aqtóbe, Túrkistan, Atyraý, Batys Qazaqstan, Pavlodar, Aqmola, Jambyl jáne Almaty oblystary, sondaı-aq Almaty jáne Shymkent qalalary.
Tergeý jalǵasyp jatyr. Ózge aqparat QR QPK-niń 201-babyna sáıkes jarııa etýge jatpaıdy.
