Semeıde 6 karer zańsyz jumys istegen
Qazirgi kezde oblys aýmaǵynda 284 jer qoınaýyn paıdalaný nysandary bar. Olardyń 145 jalpy taralǵan paıdaly qazbalardy óndirýmen aınalysady. Tekserý kezinde qıyrshyq tas, iri qumnyń zańsyz óndiriletini belgili boldy. Oblys prokýrorlary Óskemen qalasynda 9 karer, Semeı qalasynda 6 qarerdi anyqtady.
Barlaý jáne óndirýge kelisimsharttary bar 101 kásiporyn jer qoınaýyn paıdalaný quqyǵyn rásimdeý úshin jergilikti atqarýshy organdarǵa ótinish bildirmegen.
Óskemen qalasynda 2013 jyldan bastap, qazirgi ýaqytqa deıin «buzylǵan jerlerdiń alańy týraly málimetter» baǵanynda tek - 787 ga dep kórsetilgen. Sonymen qatar, qala aýmaǵyndaǵy zańsyz karerlerdiń sany ósýde, ıaǵnı, buzylǵan jerlerdiń alańy artýda. Sondaı-aq, osy jyldary 91 jer qoınaýyn paıdalanýshy kelisimshart talaptaryn buzǵan.
«Atap ótý qajet, jer qoınaýyn paıdalaný salasynda qylmystyq isterdiń qaralýy barynsha azaıdy, sońǵy úsh jylda sotqa nebári 2 is joldanǵan. Osyǵan baılanysty, oblys prokýratýrasynyń tapsyrmasy boıynsha ShQO-nyń ІІD, ekologııa departamentimen birlesip qylmystyq isterdi zerdeleý ádisin ázirleýde. Sondaı-aq, marksheıder jáne geodezııalyq jumystaryn júrgizý úshin jabdyqtardy satyp alý máselesi sheshilýde, jer qoınaýyn zańsyz óndiretin kásiporyndardyń tizimi qalyptastyrylýda», -delingen Shyǵys Qazaqstan oblysynyń prokýratýrasy taratqan habarlamada.
Tekserý qorytyndylary boıynsha, 12 jer qoınaýyn paıdalanýshy ákimshilik jaýapkershilikke tartyldy. Onyń ústine kásiporyndar óńirdiń áleýmettik-ekonomıkalyq damýy úshin bıýdjetke 45 mln teńgeden astam qarajat aýdardy. Qazirgi kezde óndirý jumystary jalǵasýda.