Semeıde 51 jastaǵy áıeldi qaǵyp óltirip, izin sýytqan júrgizýshi izdestirilip jatyr
SEMEI. QazAqparat – Semeı qalasynda rettelmegen jaıaý júrginshiler jolaǵynda eki adamdy qaǵyp ketken júrgizýshi izdestirilýde, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, 11 maýsym kúni túngi saǵat 01.45-te «Okean» bazarynyń boıyndaǵy Áýezov dańǵylynda kele jatqan belgisiz júrgizýshi Selevın kóshesindegi rettelmegen jaıaý júrginshiler jolaǵynda eki adamdy qaqqan.
«Jol-kólik oqıǵasy saldarynan 51 jastaǵy áıel sol jerde kóz jumdy. 1979 jyly týǵan er adamǵa ambýlatorııalyq emdeý taǵaıyndaldy. Al júrgizýshi oqıǵa ornynan iz sýytqan. Qazirgi ýaqytta polıtsııa qyzmetkerleri ony anyqtaý úshin tıisti sharalardy atqarýda. Beınebaqylaý kameralaryndaǵy jazbalar zerdelenip, kýágerler anyqtalýda», - dep habarlady vedomstvo ókilderi.
Atalǵan fakti boıynsha QR QK-niń 345-baby 3-bóligimen jáne 347-babymen sotqa deıingi tergeý amaldary júrgizilýde. Tártip saqshylary osy oqıǵaǵa kýá bolǵan turǵyndarǵa polıtsııa basqarmasyna habarlasýyn suraıdy.
