Semeıde 51 jastaǵy azamattan 32 keliden asa esirtki tárkilendi
ASTANA. KAZINFORM — Abaı oblysy Polıtsııa departamentiniń Esirtki qylmysyna qarsy is-qımyl basqarmasy Semeı qalasynyń turǵyny esirtki quraldaryn zańsyz saqtap, ótkizýimen aınalysatyny jóninde jedel aqparat aldy.
Atalǵan derek boıynsha QR Qylmystyq kodeksiniń esirtki quraldaryn zańsyz daıyndaý, qaıta óńdeý, alý, saqtaý, tasymaldaý, jóneltý ne ótkizý faktilerine qatysty baby boıynsha sotqa deıingi tergep-tekserý bastaldy.
Esirtki qylmysyna qarsy is-qımyl basqarmasy, «Arlan» arnaıy bólimshesi jáne Abaı oblysy PD kınologııalyq qyzmet ortalyǵy júrgizgen birlesken jedel-izdestirý is-sharalary nátıjesinde qylmys jasady degen kúdikpen 51 jastaǵy semeılik azamat anyqtalyp, ustaldy.
— Tergeý málimetteri boıynsha, ol óz úıiniń aýlasynda 10 000 teńgege jedel satyp alýǵa qatysqan adamǵa ósimdik tektes zat salynǵan eki qaǵaz oramasyn zańsyz satqan. Sot-saraptama qorytyndysyna sáıkes, tárkilengen zattyń jalpy salmaǵy 7,84 gramm keptirilgen marıhýana ekeni anyqtaldy. Keıingi tintý sharalary barysynda kúdiktiniń turǵylyqty jerinen esirtki quraldarynyń kóp mólsheri: ara, ósimdik tektes zat salynǵan birneshe paketter men karton qoraptar, erekshe ıisi bar jasyl tústi 57 túp ósimdik, esirtki qaldyqtary bar ydys jáne ózge de zattaı aıǵaqtar, sondaı-aq jedel satyp alý kezinde paıdalanylǵan kýpıýra tizbesine sáıkes keletin aqsha qarajaty anyqtalyp, tárkilendi. Saraptama nátıjesinde tárkilengen ósimdikterdiń jalpy salmaǵy 32 kılogramm 100 gramm qarasora tuqymdasyna jatatyn esirtki zaty ekeni rastaldy. Budan bólek, medıtsınalyq kýálandyrý kúdiktiniń kannabınoıdtardy qoldanǵanyn kórsetti. Qazirgi ýaqytta kúdikti ustalyp, Semeı qalalyq polıtsııa basqarmasynyń ýaqytsha ustaý ızolıatoryna qamaldy, — delingen habarlamada.
Іstiń mán-jaıyn jan-jaqty jáne obektıvti zerdeleýge baǵyttalǵan tergeý is-qımyldary jalǵasady.
Budan buryn Aqmola oblysynda jerasty esirtki zerthanasyn uıymdastyrǵandar sottalǵany anyqtaldy.