Semeıde 5 jyldyń ishinde kezekte turǵandardyń barlyǵy baspanaly bolady
SEMEI. QazAqparat – Semeı qalasynda aldaǵy 5 jyldyń ishinde kezekte turǵandardyń barlyǵy baspanamen qamtamasyz etilmek, dep habarlaıdy QazAqparat.
Bul týraly máslıhattyń kezekten tys sessııasynda qala ákimi Ermak Sálimov málimdedi. Onyń aıtýynsha, búginde shahar boıynsha turǵyn úı kezeginde 10 739 adam tur.
«Bes jylda barlyǵyna baspana berý josparlanyp otyr. Qalada qurylys jumystary qyzý júrgizilýde. Osy rette, Qaraǵaıly shaǵyn aýdanyn atap ótýge bolady. 2019 jyly kezek kútken 210 adam qonys toıyn toılaǵan edi. Onyń ishinde 103 kópbalaly otbasy, 27 jetim bala jáne 86 adam áleýmettik áljýaz tobynan. Sonymen qatar ótken jyly 15 dáriger men 18 quqyq qorǵaý organdarynyń qyzmetkeri pátermen qamtamasyz etildi», - dedi ákim.
Ermak Sálimov óz sózinde kezekte turǵandarǵa baspana berý úshin Qaraǵaıly shaǵyn aýdanyn damytýdyń bas josparyna túzetý engizilgenin, dálirek aıtqanda aýmaǵy taǵy 90 gektarǵa keńeıtilgenin aıtty. Búginde mamandar osy maqsattaǵy 92 jobany ázirleýge kirisip ketken.
