Semeıde 5 myńnan astam bala birinshi synypqa barady
SEMEI. QazAqparat – Semeı qalasynda bıyl 5 myńnan astam bala mektep tabaldyryǵyn alǵash ret attamaq, dep habarlaıdy QazAqparat tilshisi.
Bul jaıly onlaın formatta ótken baspasóz brıfıngi barysynda qalalyq bilim bóliminiń basshysy Natalııa Fesenko málim etti. Onyń aıtýynsha, oqýshylardy qabyldaý sáýir-tamyz aılary aralyǵynda elektrondy túrde júrgizildi. Bıyl birinshi synypqa qabyldanatyn oqýshylarynyń sany – 5100-ge jetip otyr.
«Birinshi synypqa baratyn oqýshylar úshin «Alǵashqy qońyraý» sharasy ótkizilip, álippeler tabystalady. Al qalǵan synyp oqýshylaryna Táýelsizdiktiń 30-jyldyǵyna arnalǵan sabaq ótedi. Bilim berý mekemeleri jaz mezgilinde aǵymdaǵy jáne kúrdeli jóndeý jumystary júrgizilgen. Ótken jyldyń qyrkúıeginen bastap qala mektepteri jekeleı qarjylandyrylǵan bolatyn. Bilim ordalarynyń terezeleri, kireberis esikteri, jylý júıesi men shatyrlary aýystyryldy», - dedi Natalııa Fesenko.
Sondaı-aq mektepterdiń antıterrorlyq qorǵanysyna úlken nazar aýdarylýda. Búgingi tańda barlyq mektepter men balabaqshalarǵa jedel basqarý ortalyǵyna qosylǵan beınebaqylaý kameralary ornatyldy.
