Semeıde 5 qabatty úı órtenip, 1 adam mert boldy
SEMEI. QazAqparat - Semeıde 5 qabatty turǵyn úı órtendi. Saldarynan 1 adam kóz jumyp, 79 adam qutqaryldy, dep habarlaıdy QazAqparat.
Órt 8 aqpan kúni saǵat 01.43-te Selevın, 15 mekenjaıynda tirkelgen. 79 adam qaýipsiz jerge kóshirildi. Onyń 20-sy bala. Al 162 adam der kezinde páterlerinen shyǵyp úlgergen.
Anyqtalǵandaı, órt kópqabatty turǵyn úıdiń birinshi qabatyndaǵy páterden shyqqan. Tilsiz jaýdy aýyzdyqtaǵan qutqarýshylar páterden er adamnyń múrdesin tapty. Qazir onyń jeke tulǵasy anyqtalyp jatyr.
«Órttiń jalpy aýmaǵy 20 sharshy metr. Saldarynan páterdiń esik-terezesi, jıhaz, turmystyq tehnıka janyp ketti. Mamandardyń aldyn ala boljamy boıynsha, órt qasaqana qoıylǵan nemese órt qaýipsizdik erejeleri saqtalmaǵan. Qazirgi ýaqytta qaýipsiz jerge kóshirilgen turǵyndardyń barlyǵy baspanalaryna oraldy»,-dedi memlekettik órtke qarsy kúres basqarmasynyń bastyǵy Ernar Jalelov.
