Semeıde 45 mln teńgege jóndelgen sýburqaq búlinip jatyr
SEMEI. QazAqparat - Semeıde 20 jyldan keıin jóndelip, byltyr halyq ıgiligine berilgen Ertis jaǵalaýyndaǵy sýburqaq búlinip jatyr, dep habarlaıdy QazAqparat.
Ertis jaǵalaýyndaǵy qaraýsyz qalǵan satyly sýburqaq qaıta jańǵyrtýdan ótip, 2017 jyldyń qazan aıynda paıdalanýǵa berilgen. Bul maqsatqa jergilikti bıýdjetten 45 mıllıon teńge bólindi. Alaıda júrgizilgen jóndeý jumystary sapasyz bolyp shyqty. Arnaıy qurylǵan komıssııa saraptama nátıjesinde osyndaı sheshim qabyldap, akt toltyrǵan. Jyl ótpeı jatyp búlingen sýburqaq pen jaǵalaýdy qaıta qalpyna keltirý jumystaryn jaýapty merdiger mekemeke endi óz esebinen jóndeıtin boldy. Sodan keıin sýburqaq iske qosylmaq. Qazir jumystar qolǵa alyndy.
Aıta keteıik, jalpy ótken jyly Ertis jaǵalaýyn jóndep, kórkeıtý jumystaryna 350 mıllıon teńge bólingen.
«Jaǵalaýda oryn alǵan olqylyqtardan habarymyz bar. Sondyqtan 4 sáýir kúni arnaıy komıssııa qurylyp, tekserý júrgizdi. Nátıjesinde durys júrgizilmegen jumystyń saldarynan sýburqaqtyń plıtalary qulap, baspaldaqtar búlingen. Jóndeý jumystaryn jasaǵan merdiger mekeme barlyǵyn óz qarajatyna qalpyna keltiredi. Kemshilikter joıylady»,-dedi Semeı qalalyq TÚKSh bólim jetekshisi Atantaı Ótelbaev.
