Semeıde 41 órt sóndirýshi dúkendi sharpyǵan jalynmen kúresýde
SEMEI. QazAqparat – Semeı qalasynda órt sóndirýshiler dúkendi sharpyǵan alapat órtpen kúresýde, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 16 sáýirde saǵat 10.00 shamasynda Semeı qalasyndaǵy Qashaǵanov kóshesinde ornalasqan dúkenniń órtenip jatqany týraly habar túsken. Oqıǵa ornyna qutqarýshylar shuǵyl kelip jetti.
«Anyqtalǵandaı, tilsiz jaý kóptonnaly konteınerler men qoıma úı-jaılaryn sharpyǵan. Qaza bolǵandar men zardap shekkender joq. Sol mańdaǵy azamattar óz betterimen syrtqa shyǵyp úlgergen», - dep habarlady vedomstvo ókilderi.
Órtti sóndirýge jeke quramnan 41 adam men 11 avtotsısterna jumyldyrylǵan. Aldyn ala boljam boıynsha órttiń jalpy aýdany 500 sharshy metrge jetedi. Jalynnyń neden shyqqandyǵy ázirge belgisiz.
