Semeıde 4 jerasty ótkeli jóndeýden ótip jatyr

SEMEI. QazAqparat – Semeı qalasynda 4 jerasty ótkelinde jóndeý jumystary júrgizilýde, dep habarlaıdy QazAqparat tilshisi.

Qalalyq aqparat ortalyǵynyń málimetine súıensek, shahar boıynsha 8 jerasty ótkeli bar. Búginde olardyń tórteýine jóndeý jumystary júrip jatyr.

Ótkelder Qabanbaı batyr, Dostoevskıı, Muhamedhanov jáne Óskemen kóshelerinde ornalasqan.

Jumysty qazan aıynyń sońyna deıin aıaqtaý josparlanyp otyr. Jerasty ótkelderin jóndeýge bıyl jergilikti bıýdjetten 16 mln teńge bólingen.

«Osyǵan deıin Áýezov, Shákárim dańǵyldaryndaǵy jáne Narodnaıa kóshesindegi ótkelder jóndelip, árleý jáne plıtka tóseý jumystary júrgizildi. Qabanbaı batyr kóshesindegi jerasty ótkelinde jaryqtandyrý qalpyna keltirildi», - dedi Semeı qalalyq jolaýshylar kóligi jáne avtomobıl joldary bóliminiń bas mamany Jasar Túsipov.

Onyń aıtýynsha, bul ótkelderde júrgizilgen jóndeý jumystaryna qatysty birqatar eskertý bar. Qazirgi ýaqytta merdigerler kemshilikterin joıýda.