Semeıde 4 mlrd teńgeniń altyn kenin tonaǵan 3 adam sottaldy

SEMEI. KAZINFORM – Abaı oblysyndaǵy qarjy-ınvestıtsııalyq korporatsııasynyń óndiristik nysanynan altyn kendi tonaǵan 3 adam sottaldy. 

Semeı qalasynyń úsh turǵynyna QR Qylmystyq Kodeksiniń uıymdasqan qylmystyq topqa qatysý jáne óndiristik ǵımaratqa zańsyz kirip, urlyq jasaý, qylmystyq jolmen alynǵan múlikti zańdastyrý syndy baptar boıynsha aıyp taǵyldy. 

Sot materıaldaryna súıensek, aıyptalýshylar «Alel» qarjy-ınvestıtsııalyq korporatsııasynyń óndiristik nysandaryna zańsyz kirip, quramynda altyny bar kendi urlaǵan. Keltirilgen materıaldyq shyǵyn 4 mlrd teńgeden asqan. 

– Tergeý barysynda «altyn bólme» dep atalatyn jerden urlyq jasaý faktileri 2019 jyldan beri júıeli túrde júzege asyrylyp kelgeni anyqtaldy. Sondaı-aq aıyptalýshylar men olardyń týystarynyń qylmystyq jolmen tabylǵan kiristerdi zańdastyrý maqsatynda qonaqúı keshenderin, kommertsııalyq ǵımarattardy, saýda úılerin, dárihanalardy, páterler men avtokólikterdi qosa alǵanda, jyljymaly jáne jyljymaıtyn múlikterdi satyp alǵany belgili boldy, - dep habarlady Semeı qalasynyń qylmystyq ister jónindegi aýdanaralyq sotynan. 

Sot sheshimimen er adamdar 10 jylǵa, 6 jyl 8 aıǵa jáne 5 jyl 6 aıǵa bas bostandyqtarynan aıyryldy. Úkim áli zańdy kúshine engen joq. 

Eske salsaq, osyǵan deıin esirtki taratý jáne kontrabandamen aınalysqan qaraǵandylyq turǵynnyń sottalǵanyn habarlanǵanbyz.