Semeıde 32 myń adamnyń kommýnaldyq shyǵyny ótelmek
SEMEI. QazAqparat – Semeı qalasynda 32 myńnan astam turǵyn kommýnaldyq shyǵyn úshin 15 myń teńgeden alýǵa quqyly, dep habarlaıdy QazAqparat tilshisi.
Qalalyq jumyspen qamtý jáne áleýmettik baǵdarlamalar bóliminiń basshysy Murat Qurjyqaevtyń aıtýynsha, karantın rejımine baılanysty kommýnaldyq shyǵyndy óteý úshin 15 myń teńge kólemindegi aqsha 7 sanattaǵy azamattarǵa beriledi. Naqty aıtsaq, I, II jáne III toptaǵy múgedekter; UOS múgedekteri men qatysýshylary; UOS múgedekteri men qatysýshylaryna teńestirilgen tulǵalar; múgedek balalardy tárbıelep otyrǵan otbasylar; kópbalaly januıalar; eń tómengi zeınetaqy alatyn zeınetkerler; memlekettik jáne qoǵamdyq mindetterin, áskerı qyzmetin oryndaý kezinde, ǵaryshqa ushýdy daıyndaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan adamdardyń otbasylary; AÁK alatyn azamattar, onyń ishinde jalǵyzbasty zeınetkerler ala alady.
«Qazirde arnaıy tizim jasaldy. Qala boıynsha jalpy sany 32 myńnan astam adam bul kómekti alýǵa quqyly. Negizgi shart - olardyń jeke baspanasy men qyzmet kórsetýshilermen kelisimsharttary bolýy tıis. Ótinishti TÚKSh bólimine berý kerek, onda call-ortalyq jumys isteıdi. Tólemder tıisti qarajat túskennen keıin berile bastaıdy», - deıdi ol.
Esterińizge sala ketsek, osyǵan deıin kommýnaldyq qyzmetke 15 myń teńge tóleýge ótinim qabyldaý ákimdikter arnaýly júıeni iske qosqan soń bastalatyndyǵy habarlandy.
