Semeıde 3 jyl turalaǵan jataqhana qurylysy jandanady
SEMEI. QazAqparat - Semeıde qurylysy toqtap qalǵan Medıtsına ýnıversıtetiniń 1000 oryndyq jataqhanasynyń qurylysy qaıta jandanbaq, dep habarlaıdy QazAqparat.
Jataqhananyń irgetasy 2014 jyly qalanyp, birinshi qabaty boı kótergen. Biraq 2015 jyly merdiger mekeme men tapsyrys berýshiniń arasynda túsinispeýshilik bolyp, qurylys jumystary toqtaıdy.
Araǵa birneshe jyl salyp, jataqhananyń qurylys jumystary qaıta bastalady. Qurylysyna 2 mlrd 246 mln teńge qarjy bólingen. Al 2014 jyly qarjynyń 371 mln teńgesi ıgerilip, qurylystyń 16,5 paıyzy atqarylǵan.
«Korpýstyń bireý kitaphana men ashanaǵa arnalady. Al qalǵan 6 korpysta stýdentter turady. Búgingi kúni Medıtsına ýnıversıtetinde 5 379 stýdent bilim alyp jatyr. Onyń ishinde tek qazaqstandyq emes, sheteldik stýdentter de bar. Sondyqtan jataqhana máselesin sheshý ózekti. Qurylys jumystary 2020 jyly aıaqtalady dep josparlanyp otyr»,-dedi Medıtsına ýnıversıtetiniń rektory Ersin Júnisov.
Aıta keteıik, Atalǵan 1000 oryndyq jataqhana stýdentterdiń baspana máselesin sheshýge yqpal etpek. Óıtkeni, oqý ornyna elimizdiń basqa óńirleri men shetelden kelip, bilim alatyn jastar kóp.
