Semeıde 3 kún ishinde 500-ge jýyq adam jol erejesin buzǵan
SEMEI. QazAqparat – Semeı qalasynda «Qaýipsiz jol» jedel aldyn alý sharasy barysynda 500-ge jýyq zańbuzýshylyq anyqtaldy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, jedel aldyn alý sharasy kezinde tártip saqshylary jol-kólik oqıǵalarynyń ósýine áser etetin jol erejelerin óreskel buzýshylyqtardy anyqtaýǵa jáne jolyn kesýge baǵyttalǵan reıdter ótkizdi. Osylaısha, 3 kún ishinde 481 ákimshilik quqyq buzýshylyq anyqtalǵan.
«Kólik quralyn júrgizip kele jatyp, uıaly telefon paıdalanǵan 34 adam jazalansa, 73 júrgizýshi jaıaý júrginshilerdi ótkizbeı qoıǵan. Sonymen qatar túrli zańbuzýshylyq jasaǵan velosıped, moped júrgizýshileri jáne jaıaý júrginshiler jazaǵa tartyldy», - dedi Semeı qalalyq Polıtsııa basqarmasy bastyǵynyń orynbasary Radık Saıfýdınov.
