Semeıde 24 qoı urlaǵan úsh er adam ustaldy
ShQO Polıtsııa departamenti baspasóz qyzmetiniń málimetine súıensek, «Barymta» jedel aldyn alý sharasy barysynda tártip saqshylary «Semeı-Qaraýyl» tasjolynda «Zıl-130» avtokóligin toqtatqan.
Polıtseıler tekseris kezinde kólikke tıelgen eshqandaı qujaty joq 4 qoıdy kóredi. Anyqtalǵandaı, bul «Semeı-Qaraýyl» tasjolynan 78 shaqyrym qashyqta ornalasqan 45 jastaǵy sharýa qojalyǵy ıesiniń maly bolyp shyqty. Atalǵan fakti boıynsha QR Qylmystyq kodeksiniń 188-baby 1-bóligi 2-tarmaǵyna sáıkes sotqa deıingi tergeý amaldary bastaldy.
«Belgili bolǵandaı, kásipkerdiń malyn baǵýǵa jaldanǵan 34 jastaǵy eki azamat 31 jastaǵy semeılik tanysymen qylmys jasaýǵa aldyn ala sóz baılasqan. Sóıtip oǵan ózderine baǵýǵa senip tapsyrylǵan otardan 4 bas qoıdy bazar baǵasynan arzanǵa tıep berdi. Qazirgi ýaqytta úsheýiniń 2020-2021 jyl aralyǵynda jábirlenýshiniń quny 1,2 mln teńgelik jalpy sany 24 qoıyn osyndaı jolmen urlaǵany dáleldendi. Sondaı-aq kúdiktilerdiń buǵan uqsas ashylmaǵan basqa da qylmystarǵa qatystarynyń bar joǵy tekserilýde», - dedi ShQO PD bastyǵy Saǵat Mádıev.