Semeıde 2 myńǵa jýyq túlek mektep bitirdi
Qala ákimdiginiń málimetine súıensek, búgin Semeıdegi barlyq mektepte sońǵy qońyraý merekesi ótti. Shahar basshysy Nurbol Nursaǵatov Shákárim mektep-gımnazııasynda bolyp, ustazdar men oqýshylardy quttyqtap, mektep bitiretin túlekterge aq jol tiledi.
«Mektep– qashanda jaqsylyq pen izgiliktiń, parasattylyq pen kemeńgerliktiń, tanym men tárbıeli isterdiń qasıetti ordasy. Endeshe, mektep bitirýshi túlekterimiz oqýshylyq ómirde osyndaı ulaǵatty isterdiń ushqynyn boıyna sińirip, baıypty baǵdaryn boılaryna darytyp, bilim kókjıegin keńeıte bildi dep sanaımyn. Jarqyn bolashaqqa bastar joldaryńyzǵa aq jol tileımin», - dedi ol.
Qala boıynsha 68 mektepte bıylǵy oqý jylyn 1937 túlek támamdap otyr. Onyń ishinde 60 túlek «Altyn belgige, 155 túlek «Úzdik attestatqa» úmitker.
Osy oqý jylynda Semeı oqýshylary respýblıkalyq, halyqaralyq baıqaýlar men olımpıadalarǵa qatysyp, jetistikterge jetti. Atap aıtqanda, ǵylymı joba boıynsha oblysta 71, respýblıkada 4, halyqaralyq deńgeıde 2 oqýshy júldeger atanǵan. Sporttyq saıystar men shyǵarmashylyq konkýrstardyń respýblıkalyq kezeńinde 85 oryn bolsa, halyqaralyq sporttyq jarystarda 43 oqýshy jeńiske jetti.
