Semeıde 2 qarjy pıramıdasyna qatysty is qozǵaldy
SEMEI. QazAqparat - Semeıde «Qarjy ınvest» jáne «Nur Qarjy» JShS ınvestıtsııalyq kompanııasynyń dırektoryna qatysty qylmystyq is qozǵaldy, dep habarlaıdy QazAqparat.
Búgin san soǵyp qalǵan salymshylarmen quqyq qorǵaý organdary jáne jergilikti bılik ókilderi kezdesý ótkizdi. Jıynǵa 300-ge jýyq qala turǵyny keldi. Barlyǵy «tıynnan teńge quraımyn» dep aldanyp qalǵandar.
Semeı qalasynyń prokýrory Marat Týrýbaevtyń sózinshe, 14 aqpan kúni seriktestik dırektoryna qatysty qylmystyq is qozǵalǵan. Qazir tergeý jumystary júrýde.
«Qazir biz kúshpen kompanııanyń dırektoryn ákele almaımyz. Óıtkeni, naqty kináli ekeni belgisiz. Biraq ol eshqaıda kete almaıdy. Tergep-tekserý jumysy júrip jatyr. Qazir kompanııanyń esepshotynda belgili bir somada aqsha bar. Ol aqshany jumsaı almaıdy. Sebebi shotyn buǵattadyq. Biraq qazir men naqty somany aıta almaımyn. Ol ózi sol shottaǵy aqshany sizderge qaıtaryp berý kerek nemese ózi nesıeni jabý kerek. Biraq ol budan bas tartyp otyr. Sondyqtan biz onyń shotyndaǵy aqshany sheship, sizderge tarata almaımyz. Bul zańsyz. Ózi erikti túrde berý kerek. Eger ol istemese bul máseleni sot arqyly sheshý kerek», - dedi Marat Týrýbaev.
Kompanııanyń jabylyp qalǵany jaıly osy júıege aqsha salyp, san soǵyp qalǵan turǵyndar aıtqan. Іshki ister basqarmasyna júgingen olar salǵan aqshalaryn qaıtaryp berýdi surap otyr. Óıtkeni, aqshasyn ústemelep alýǵa qyzyqqan adamdar bankterden tipti 1 mln. teńgege deıin nesıe rásimdep, oılanbastan ótkize bergen. Alǵan aqshanyń 40 paıyzyn kompanııaǵa berse, qalǵany óz qaltasynda qalǵan. Al rásimdegen nesıeni kompanııa tólep otyrǵan. Alǵashynda turǵyndardyń nesıesin ýaqytymen tólep, senimge kirgen. Osylaısha, 3 jylǵa jýyq ýaqyt ishinde salymshylary kóbeıip, kompanııanyń jospary júzege asqan. Aldanǵandar arasynda zeınetkelerge deıin bar. Biraq, ázirge naqty sany belgisiz.
Turǵyndardyń ótinish-narazylyqtaryn tyńdaı kele, qala basshylyǵy bank basshylyǵymen kelisip, nesıe óteý kúnin ýaqytsha toqtatý jaıyn qarastyratyn bolyp ýaǵdalasty. Jıynnan shyqqan halyq ózderi nesıe alǵan bankke tólemaqyny ýaqytsha toqtatý jóninde ótinish jazý úshin bet aldy. Máseleniń qalaı sheshim tabatyny tekseristen keıin belgili bolady. 
